Məzun yarmarkasına 600 iş yeri çıxarılıb

2009-05-26 07:53:25

Gənclər daha çox bank sektorunda iş axtarır.

Gənclər və İdman Nazirliyinin dəstəyi ilə Dövlət İqtisad Universitetində keçirilən IV məzun yarmarkasında 60-dan çox şirkət tələbələrə vakansiyalar təqdim edib. Yarmarkaya qatılmış 2 minə yaxın məzunlara təqdim olunan vakant iş yerlərinin sayı isə 600-dən çox olub.

Gənclər və İdman Nazirliyindən Lent.az-a bildiriblər ki, işçi axtaran şirkətlər qismində özəl müəssisələrlə yanaşı Dövlət Neft Şirkəti, Dövlət Gömrük Komitəsi, Vergilər Nazirliyi kimi iri dövlət orqanları da yarmarkada iştirak edib. Bu təşkilatlar əsasən, müvafiq sahələrdə çalışmaq istəyənləri təlimatlandırmaq funksiyasını yerinə yetirib.

Nazirlikdə deyirlər ki, hazırda işçi axtaran şirkətlərdə bank, maliyyə, menecment, marketinq, idarəetmə sahələri üzrə gənc mütəxəssislərə daha çox ehtiyac duyur. Bu yarmarkada isə məzunların marağı daha çox bank sektoruna olub. Məhz bu səbəbdən şirkət nümayəndələri bir qrup millət vəkillərinin iştirakı ilə Dövlət İqtisad Universitetinin rəhbərliyi ilə görüşüb və onlar belə yarmarkaların tez-tez keçirilməsini təklif ediblər. Millət vəkilləri və universitet rəhbərliyi işçi axtaran şirkətlərin nümayəndələrinə gənclərin işə cəlb olunması üçün lazımi şərait yaratmağı tövsiyə ediblər.
Xatırladaq ki, növbəti məzun yarmarkasının yaxın günlərdə Gəncə şəhərində keçirilməsi planlaşdırılır.

LENT.AZ

geri